كل عام وانتم بخير

كل عام وانتم بخير وصحة وسلامة

وتقبل الله طاعتكم
almishal-المشعل

عيدكم مبارك

عيدكم مبارك وعساكم من عواده

almishal - المشعل

أحلى رمضان

وكعادتي دائماً ابدأ متأخراً في الكتابه حتى صار الكسل من ابرز سماتي والسبب طبعا هو الخدامه

أحلى رمضان

***

من المعروف اني ما اتابع التلفزيون لا في رمضان ولا في غير رمضان علاقتي مع التلفزيون علاقة (اكسيّه) وهذا شي معروف عنّي منذ الصغر عشان جذي يكون عندي وقت كبير في رمضان بعد صلاة العصر لكن المشكلة ان الجو حار مايصلح حق التمشي والطلعات ولهذا السبب أحلى رمضان عندي هو رمضان اللي يكون في فصل الشتاء

• في الشتاء يكون النهار قصير فمانحس بتأثير الصيام
• في الشتا الواحد يقدر يطلع للبر ويتمشى ويشوف الغيوم ويستمتع بنزول المطر
• في الشتاء يكون الليل اطول من النهار وحلاة رمضان في الليل

واسباب كثيرة تخليني أفضّل رمضان في الشتاء وماراح نشوف رمضان في الشتاء الا بعد سنين طويله

قبل الفطور

***

اللي يتمشى قبل الفطور بوقت قصير او يكون برا البيت يشوف تجاوزات مروريه كثيره مثل قطع الاشاره الحمرا السرعة الجنونيه كل هذا بس عشان يلحّق على تمر ولبن ما اذكر مر علي رمضان من غير ما اسمع عن فلان سوا حادث او فلان مات بحادث

والله يستر على الجميع

المشعل - almishal

حديث السفر

مع اني سافرت ورجعت من زمان ومرّت علي احداث وسوالف كثيرة لكن فيه سالفه ظلّت عالقة في بالي

***

الضمير

***

سافرت للسعوديه وحضرت عرس لأثنين اخوان في ليلة وحده وباليوم الثاني كان فيه عشى عند عند اهل العرس حضرت العشى وقال ابو العرسان سالفه

يقول:لما كنت اشتغل في الدفاع المدني في سنة 1990 قبل الغزو كان فيه واحد سوداني يشتغل عندنا وكنّا نجيب انواع الاكل والفواكه والخضروات واطيب المشروبات وكان السوداني يرفض انه ياكل معانا يجلس بروحه وياكل خبز وماي

نسأله ليه يافلان ما تاكل من الاكل الطيّب ومن هالخير

يقول السوداني: والله ما اقدر ضميري مايخليني اكل ... مايصير انا اكل من هالخير وعيالي بالسودان ذابحهم الجوع

***

يمكن السالفه اذا مرّت عليكم بتكون عاديه لكن انا وقتها تصورت نفسي في هالموقف..(الله لايقولها انشاءالله) ـ

لكن السؤال لو كان احد منكم في هالموقف شنو راح يسوي؟؟

----------------------------------

المتصفحين من السعوديه لايمكنهم مشاهدة الصور المرفوعه عن طريق سيرفر بلوقر لذلك لايمكنهم مشاهدة الصور المرفقه مع المواضيع ....قريباً انشاءالله احل المشكلة في هذا البلوق

الشرطة النسائية

سوف يشهد العام الدراسي 2006/2007 وللمرة الأولى في تاريخ الكويت دخول المرأة الكويتية في أكاديمية سعد العبدالله للعلوم الأمنيه ومن ثم الأنخراط في سلك الشرطة لتباشر عملها في في المنافذ البريه والبحريه وفي المطارات وأيضاً في السجون النسائية فقط كبدايه وقد تشهد توسعاً في تولّيها المهام في السنوات القادمه

* * *

أنا اعتقد بأنها خطوه ايجابيه وأن الكويت تأخرت في تطبيق هذه الخطوه خصوصاً وأن المرأه تشكل تقريباً مايعادل نصف المجتمع او أقل بقليل وهناك إستهزاء من قبل النساء بالاجهزه الأمنيه وعدم احترام قوانين المرور والتهجم على افراد وضباط الشرطه وتلفيق التهم الباطله لهم والتشكيك في امانة العاملين في هذا الجهاز الأمني

ومن جهه أخرى هناك كثير من الأمور والمشاكل التي لايستطيع رجال الشرطة التدخل فيها او التواجد بالقرب منها كالأماكن النسائية المغلقه كالشواطئ والمدن المائية والصالونات والمدارس ...............الخ

وقد يكون لوجود الشرطة النسائية اثر كبير في القضاء على ظاهرة (البويات) والمعاكسات وبائعات الهوى وفرض قيود أمنية على أصحاب النفوس الضعيفه

هل أنت مع وجود الشرطة النسائية؟
	نعم
	لا
	لا أدري
إستفتاءات المشعل

Back to school with increase

طلعت امس للسوق ادوّر على شورت سباحه بعد مانسيت شورتي بالنادي وضاع ..دخلت السوق والا السوق كله ملابس مدرسيه وحتى السوبرماركت مثل مركز سلطان وسيتي سنتر والمراكز الكبيره كلهم منزلين اغراض مكتبيه وشنط وملابس مدرسيه ..طبعاً ضاق خلقي من شفت أغراض المدرسه تو الناس على المدارس

مايمديهم استناسوا بالعطله هالطلبه وأولياء الامور بعد الله يعينهم على المصاريف

المهم

كمّلت طريقي للبحث عن شورت سباحه كل ما ادخل محل يطلّع لي نوعيات تعبانه ويقولي بخمس دنانير والا بسته

انا انصدمت...!!! شسالفه ... تذكرت المنحه الاميريه+ زيادة الخمسين

المهم استمرت رحلة البحث ومعاي رفيجي

دخلنا على اخر محل

وبعد المكاسر قال بـ3 دنانير

رفيجي يكلم صاحب المحل : يبه اذا شغلتك هذي ماتطلع فلوس روح افتح لك بسطه في سوق الخضرا ترى والله الخضرى ربحها زين

صاحب المحل: والله ماتوفّي والله لو بتوفّي حقها كان عطيتكم غير هالسعر

حتى ان اصحاب المحلات باين عليهم شبعانين لدرجة ان الواحد اذا كاسرته بدينار يقولك لا مانبيع!!!ـ

وبالاخير طلعنا ماشرينا شي لان والله مو كفو اللي يشتري منهم هذولا اذا مالقوا احد يوقفهم بياكلونا والا شورت سباحه من ابو طقه بعد مو من النوع الجيد بـ6 دنانير قبل كنت اشتري من النوعيات الممتازه بأقل من دينار ونص والله ماتسوى هالقراطيس يبيعونها بسعر الذهب

لكن الله يعين اللي عنده عيال بالمدارس وتوه جاي من السفر شكله بياخذ قرض حق مستلزمات المدارس

إصرار على الخطأ

كنت في الصاله متمدد ومالي خلق على شي من بعد احداث لبنان والحوادث المروريه اللي صارت ومن بعد زيارة المستشفيات وكثرة الشغل والتفكير وقلة النوم والراحه وهم بعد الخدامه سافرت
كانت الوالده قاعده عندي وتقولي انها بتعطي الثلاجه البيضا للسايق وتفتك منّه
عندنا ثلاث ثلاجات بالمطبخ وانا عرفت الثلاجه اللي تقصدها امي
قلت:يمه لون الثلاجه أخضر مو ابيض
الوالده:لا لونها ابيض
انا:بكل ثقه وإصرار ....لونها اخضر
الوالده:وعلى وجهها علامات التعجب والاستفهام......مادري بس انا اشوف لونها أبيض
انا:ايه كله مدوخيني اغلب كلامك ووصفكم يطلع غلط
اشتغلت على الوالده من هالكلام والوالده ساكته وبعدها قامت وراحت للمطبخ تشوف الغدا وانا قمت بروح لداري وانا بالطريق سمعت الوالده تناديني التفت والا اشوف الثلاجه لونها ابيض
امي تنادي.. مشعل تعال ...وينك ..الثلاجه لونها أبيض...وين رحت؟؟
انا طبعاً من الفشله اسرعت في خطواتي كأني ماسمعت شي وكاتم الضحكه وصلت لداري وتمددت على السرير من التعب ...بعد وقت قصير جداً دخلت الوالده علي وانا غطيت راسي بضحك بس ماسك نفسي عن الفشله

قالت لي روح جيب اغراض من الجمعيه ....انشاءالله

الحمدالله ماجابت طاري السالفه ...لكن انا مصر على ان لون الثلاجه أخضر