سياسة الدرزن

يسألوني كثير من الشباب انت ماتروح السوق؟؟ حتى الاهل يسألوني نفس السؤال

انا اروح السوق لكن اروح له مره في السنه او اقل من مره في السنه بس اذا رحت اخذ اللي يكفيني لمدة سنه لان ملابسنا ماتكلف ونوعيتها جيده ورخيصه يعني انا اخذ جم بدله حق الرياضه وفيه ملابس الواحد يشتريها مره بالعمره مثل ملابس السباحه اما الملابس الداخلية فهذي اشتري منها درازن لان الجو عندنا بالكويت حار بالاضافه إلى الملوثات البيئيه الموجوده في الجو فالواحد لازم يبدل ملابسه بشكل يومي وخصوصا اللي يشتغلون بالحر

هواء ملوّث+حراره عاليه+عرق=امراض جلديه واماكن خصبه لنمو الفطريات والبكتيريا

وايضاّ النظافه من الايمان

المهم ان بـ10 دنانير او 15 دينار الواحد يشتري له درازن من الملابس الداخليّه تكفي الاجيال القادمه وهي بالاصل ماتكلف يعني اسعارها مابين الـ300 فلس إلى 500 فلس من غير الخصم اللي تاخذه لما تشتري بالجمله

لكن مو هذا السبب اللي يخليني اتخذ هذي السياسه الشرائيه

الحين الواحد اذا راح السوق يلقاه مليان نسوان قلنا مو مشكله لكن لما تلقى القسم الرجالي كله بنات هنيه المشكله

لان 95% من البضاعه الموجوده في الاسواق هي بضاعه نسائيه او للأطفال وحنا اقل من 5% لكن مع هذا نلقى ان اكثر من يشتري الملابس الرجاليه هم البنات واعمارهم مابين الـ16 والـ20 يعني مو جايه تشتري لعيالها مثل ما يدّعون بعض البنات

مره دخلت السوق رحت للقسم الرجالي والا اسوف بنتين وحده تقلّب بالجنزات والثانيه واقفه بجنبها بس مو يم الملابس لما مريت استغربت من هالمنظر فعطيتهم نظرة استغراب وبعدها نظرة استحقار لان اشكالهم غلط في هالقسم انتبهت لي اللي واقفه وسحبت صاحبتها اللي تقلّب بالجنزات وانحاشوا وهم يضحكون ضحكت المفتشل

والا وحده قاعده وحاطه رجل على رجل وتطالع الصور الموجوده على غلاف بعض الملابس والمشكله انها صور رجاّل بالملابس الداخليه شبه عاري والاخت ماخذه راحتها تنطر اخوانها الصغار يخلصون والشباب حاشيمنها يبونها تحس لكن هي ولا همّها بالاخير الشباب قالوا هي المفروض اللي تستحتي من حنا وقاموا يبدلون وهي الوضع عندها عادي لان في القسم الرجالي مرات مايكون فيه غرفة قياس فيبدلون بين الملابس وخاصه اذا كان لابس دشداشه ويبي يقيس بنطلون فلازم يفصخ ويلبس يعني بالعربي حنا الرجاجيل نستحي لما نشوف واحد يبدل وشلون اذا كانت بنت

كلش ولا اللي واقفات عند الشمغ والغتر والفنايل

وحده تقول لرفيجتها ياحليلهم والله مدلعينهم وحاطين لهم غلاف فاخر وشغلهم نظيف

ترد الثانيه:قطع ....شوفي بعد اسعارهم رخيصه

والله ما اقول الا مالت عليكن

ولما تجي تحاسب عند الكاشير تلقى حرمه معاها نفس الملابس اللي معاك والمقاسات اللي ماخذتها مقاسات رجاليه مو مقاسات اطفال عشان نقول حق عيالها