الاهل مع الزوجه

كنت قاعد في الديوانيه اتابع قناة ام بي سي 2 وماصارلي 10 دقايق من قعدت

دخلت علي الوالده

الوالده:السلام عليكم

انا: وعليكم السلام ورحمة الله وبركاته.........هلا يمه

الوالده: هاااه ياولد ...شخبارك

انا :منيييح .نشكر الله

الوالده:عندك شغل

انا : امري

الوالده :ابيك توديني لبيت خوالك

انا: انشاءالله...انطرج بالسياره

وبعد ما ركبت الوالده حركت وعند مدخل الشارع دخلت سياره نوع جيب ما انتبهت للي يسوق لاني ما احب اطالع بخلق الله

الوالده: مو هذي سيارة خالد

خالد هذا ولد جيرانا

انا: والله ما انتبهت له بس السياره هذي اشوفها تصفط عند بيتهم

الظاهر هذا خالد

الوالده: يقولون انه خاطب

انا: شدراج

الوالده:امه تقول انهم اخطبوا له من بنات عمه

انا :والله يا يمه ما ادري من زمان ماشفته ولا ادري عنه اخر مره سلمت عليه كان قبل سنين

الوالده: محمد بعد تقول امه انهم اخطبوا له

محمد هذا ولد جيرانا الثاني وواحد من ربعي وكلهم اصغر مني

انا: صج ....انا اشوفه مكشّر والابتسامه شاقه الوجه انا ملاحظ انه مو خالي عنده سالفه بس مايبي يعلم

الوالده: اخطبوا له بنت خاله يتيمه وماعندها اخوان ولا خوات بس عندها امها

انا:الله يوفقه

تعرفون سوالف حريم سالفه تجر سالفه وانا ما ادري منو فلانه ولا منو ام فلان

إلى ان وصلنا للزوجه الموظفه

تقول الوالده:الحين الشباب التالين مايصرفون على حريمهم وخاصه المدرسات يشتكن يقولن ان ازواجهن مايعطونهن معاشات

انا: ليه يعطيها معاش وهي موظفه

الوالده:المفروض يعطونهن معاشات وهذا حقهن الشرعي

انا:لو هي قاعده بالبيت نقول من حقها لكن وحده موظفه وتستلم راتب وزوجها مو محصل منها لا ريوق ولا غدى ولا راحه ولا هم يحزنون يعطيها راتب على شنو

المفروض هذي تحمد ربها ان زوجها ساكت

الوالده: ليش ياخذ موظفه

انا: كل البنات الحين موظفات

الوالده:هذي البيوت مليانه بنات واللي مو موظفات واجد

انا: والله هذولا اللي اخذوا موظفات مو شايفين الراحه والله اللي ياخذ له وحده متعلمه وتقعد بالبيت احسن له 100 مره من الموظفه ومين بماله اشترى بالدنيا راحة البال

المهم اني بسكّر الموضوع لان الصراحه ردة فعل امي مخيّبه للأمال

وتغيّرت السالفه لما امي شافت بيت

قالت: هذا بيت فلانه طلقها رجلها رفعت عليه قضيه واخذت نص البيت

انا:بــعـــــــــــــــــــــــــــــــــد اخذت نص البيت ليه

الوالده:احسن يستاهل متزوج عليها ومايعطي عيالها مصرف

انا: ااايه سوالف حريم على طوول خليتوا العيب في الرجال الوحده اذا طلقها رجالها قالت هذا فيه وفيه ومايعطينا شي وذبحنا الجوع وكل هذا بس عشان انه اخذ عليها وحده ثانيه

الوالده: وليه ياخذ وحده ثانيه

انا: حق شرعي والا نسيتي سالفة الراتب يوم تقولين حق شرعي هههههههههه وحده بوحده

ضحكت وانا من داخل ضايق خلقي من ردة فعل امي

طارت احلامي في الهوا

كنت حاط في بالي اخذ ربع الراتب منها وفوق هذا بعد خمس سنين من الزواج اتزوج عليها

وان كان ولابد اتزوج الثانيه مسيار

ولابعد بكل ثقه ضامن اهلي يوقفون معاي لكن من شفت ردة فعل الوالده مع هالامور ضاق خلقي

لازم اعيد حساباتي من جديد

والله الزمن هذا زمن اغبر زمن تغيرت فيه كل المعاني

زمن كله واقف مع الحريم حتى الاهل مع الحريم على ولدهم

قبل يقولون البنت اذا طلعت من بيت زوجها زعلانه يردونها اهلها قبل لاتدش البيت

ااايه الله يرحم ايام اول

الحين البنت اذا زوجها رفع عليها صوته اشتكت عليه عند المخفر والا اذا دز لها مسج معصب عليها سجلت عليه قضيه سوء استخدام

هههههههههههههه المشكله انه زوجها

ماني قادر اتخيّل عايشه معاه في بيت واحد وفي غرفه وحده وبينهم قضايا

*******************************

نهاية الكلام

انا مايهمني راتب الزوجه ولا وجود الزوجه الثانيه في حياتي

كلها تظل مجرد احلام عازب قبل الزواج

ارفض الزواج من خارج البلد

ارفض تعدد الزوجات من دون معنى او قدره على المسئووليه

انتم شرايكم هل من حق الزوج انه ياخذ من راتب زوجته اذا كان متكفل بكل شي؟؟

وعشان نبث الطمأنينه في قلوب الشباب نعم انا عن نفسي من حق الزوج